الضمير

قصيدة للشاعر اللبناني طارق حسن أبو عز الدين

لا تِزْعَل   يا إنســــــــــــــان

سْلاحْ الضمير أقوى من أيِّ سِلاحْ

لا تِسْتهتِر   بالضمير

شو  بْيَعْمِل   بهالظلاّمْ

بْياخُذ ع جْهنَّم مَشاويرْ

بِالوَعي أو بالأحلام

واللِّـي من دونو بيعيش

أكيد مَنّو إنســــــــــــــــــــــان

وْمَهْما يْجَمْعوا المَلايين

وْيتْباهوا    ويعَلّوا   الصَوْت

مْليح الرَّبْنا ربّ   الكون

قاهِر   عَبيدو   بالمَوْت

وبَعِدْهُنْ ما شِبْعوا أموال

وما بْيسْتِحوا مِن العيوب

الكفنْ ما بْياخذ ثَرْوات

إلو لِلأعْمَال جْيوب

لا تِهْتم يا مظلوم

جايي مين يحطّ الحقْ

والظالم وَيْن بَدّو يْروح

لمّا وَقتْ الساعه يْدِق

لا تِهْتم يا إنســـــــــــــــــــان

سْلاح الضمير أقوى من أيِّ سِلاحْ

واللِّـي من دونو بيعيش

مِش عاقل مَنّو إنســــــــــــــــــــــــــــان…

حقوق النشر محفوظة يرجى عدم الاقتباس أو الاستخدام دون موافقة دار النشر الخطية